"Marcèla Delpastre e l'amor"

En naviguant sur le site de la "Federacion dels Ensehaires de Lenga e Cultura d'Òc" (FELCO), je suis tombé sur un beau poème de l'écrivaine corrézienne Marcèla Delpastre (1925-1998), intitulé "L'amor" et que voici (puisque le joli mois de mai -et du fais ce qu'il te plaît- est déjà là):

Quand seriàs pus riche que lo rei d'un país, pus poderós que l'emperaire ;

quand auriàs tant de terra e tant de labors que lai ne coige pas lo jorn  ;

la mar mai los peissons e los ausels que son dessús, los bòscs, los prats e lo bestiau de l'erba ;

e quand comandariás tant d'òmes e tant de vilas que degun ne'n sauguessa lo compte ;

tu qui n'as pas l'amor, n'as res.

Mai quand saubriàs tot çò qu'òm pòt saber, qu'auriàs lo don de la paraula ;

que la glòria se pausessa sus tu e corone ton front de chasne  o be de leuna  verda ;

quand ton nom montarià de tota gòrja coma un chant de lauvenja e de jòia ;

si tu n'as pas l'amor per te flurir l'arma e lo còrs coma una flamba nueva,

si n'aviàs pas l'amor, n'as res.

Ses res, tu que ses rei, sabent, riche, poëta, emperaire.

N'as res, tu que n'as pas l'amor.

Quand podriàs dire ad aquela peira : "geta-te dins la mar", e que la peira se negessa,

si ne pòdes pas dire a la femna qu'aimas : "Balha ta man per m'apoiar, marchem ensems",

dija ? – Quala sabor a ton pan ? E de qué serv ta glòria ? Si tu n'as pas l'amor,

per ne'n morir, mai per ne'n viure…   

Saumes Pagans, 1èra ed. IEO Novelum, 1974, 2nda edicion Chamin de Sent Jaume, 1999, p. 53)

xxx